KURPRISHTINA

Vizita e delegacionit të KUR “Prishtina” sh.a. në
Republikën e Shqipërisë

Një pjesë e menaxhmentit të lartë të KUR “Prishtina”- sh.a. në bashkëpunim me Bordin e Drejtorëve të kësaj kompanie, ditë më parë, përkatësisht në periudhën prej datës 21 deri më 24 maj të këtij viti, ka realizuar një vizitë pune në Republikën e Shqipërisë. Më datën 22.05.2008, fillimisht është realizuar takimi i dyanshëm në Ujësjellësin e Korçës. Është pritur nga drejtori menaxhues z. Petrit Tare me bashkëpunëtor. Gjatë takimit miqësor dhe vëllazëror është biseduar për tema të ndryshme që kanë të bëjnë me sferën e furnizimit me ujë të pijshëm dhe mirëmbajtjen e rrjetit të ujërave të ndotura. Ujësjellësi i Korçës është njëri ndër ujësjellësit më modern në Evropë. Kjo ka mundësuar shkallën më të ulët të humbjeve teknike dhe komerciale të ujit të pijshëm, përkatësisht shkallën më të lartë të arkëtimit të faturave për shërbimet e ujit të pijshëm dhe ujërave të ndotura. Gjithashtu janë diskutuar edhe çështje të ndryshme rreth funksionimit të Bordit të Drejtorëve (përkatësisht Këshillit Mbikëqyrës-sipas legjislacionit shqiptar). Nikoqiri i takimit kishte organizuar shikimin në tërësi të ambienteve të punës, stacioneve të pompimit,qendrave të konsumatorëve etj. Përveç kësaj, agjendën e takimit e kishte begatuar edhe me vizitat relaksuese në: Muzeun e artit mesjetar, Mësonjëtoren e parë shqipe dhe qerasja me një kafe në Vilën e patriotit shqiptar Themistokli Gërmenji. Tërë këtë takim me përkushtim të madh e kanë përcjellë edhe mediat elektronike dhe të shkruara ( dy televizionet lokale që veprojnë në Korçë dhe një gazetë lokale). Memorandumi i bashkëpunimit pritet që të nënshkruhet gjatë këtij viti në një vizitë kthyese në Prishtinë. Ndërkaq, më datën 23.05.2008 e njëjta përbërje realizoi të njëjtën vizitë pune në Ndërmarrjen e Ujësjellës kanalizimeve në Tiranë . Nikoqiri, përkatësisht drejtori menaxhues z. Konstandin Budurushi me bashkëpunëtorë kishin bërë të gjitha përpjekjet që takimi të kalojë në frymën punuese i përshkruar me ngrohtësinë vëllazërore.
Përkundër angazhimeve të vazhdueshme UKT-ja ballafaqohet me shkallë të lartë të humbjeve teknike dhe komerciale të ujit dhe me shkallën jo të kënaqshme të arkëtimit të faturave.
Gjithashtu është biseduar për kompetencat, përgjegjësitë dhe detyrimet e pushtetit vendor karshi përmbushjes së detyrimeve të dyanshme për rritjen e nivelit të cilësisë së shërbimit.
Përveç karakterit punues, nikoqiri befasoi mysafirët duke shpalosur një pano me përmasa 5 metra gjatësi dhe 1 metër gjerësi në të cilën shkruante “Gëzuar Pavarësinë Kosovë”. -Kjo pano kishte qenë e vendosur në hyrje të ndërtesës administrative për një muaj rresht në periudhën 17.02-17.03.2008.
Gjithashtu në këtë takim u vendos që Memorandumi i bashkëpunimit pritet që të nënshkruhet gjatë një vizitë kthyese në Prishtinë që do të organizohet gjatë këtij viti.